Қазақстан Республикасының жаңа Конституциясы жобасы елдің конституциялық дамуына сапалы мазмұндық өзгерістер енгізуді көздейді. Жаңа редакцияда Конституцияның құрылымы жүйеленіп, Кіріспе, 11 бөлім және 95 баптан тұратын нұсқаны бекіту ұсынылып отыр. Бұл құқықтық нормалардың айқындылығы мен қолданылу тиімділігін арттыруға бағытталған.
Жобаның басты жаңалығы – Кіріспеде адам құқықтары мен бостандықтарының мемлекеттің негізгі басымдығы ретінде алғаш рет айқындалуы. Бұл тәсіл Қазақстанның құқықтық мемлекет ретіндегі бағытын нақтылап, адамның қадір-қасиетін конституциялық деңгейде қорғауды күшейтеді.
Сонымен қатар, бірлік пен ынтымақ, этносаралық және конфессияаралық келісім Қазақстан мемлекеттілігінің іргетасы ретінде белгіленді. Егемендік пен тәуелсіздік, унитарлық сипат пен аумақтық тұтастық өзгермейтін конституциялық құндылықтар санатына енгізілді.
Алғаш рет Әділеттілік, Заң және Тәртіп, сондай-ақ табиғатты аялау қағидаттары Конституция деңгейінде бекітіліп, мемлекеттің ұзақ мерзімді дамуының құқықтық негізін қалыптастырды. Бұл өзгерістер қоғам мен мемлекет арасындағы жаңа жауапкершілік моделін орнықтыруға бағытталған.
